ADIGANG ADIGUNG ADIGUNA
Oleh: Dra. Mamik Minarti
Bangsa
Indonesia, mligine kang urip ing bebrayan Jawa nduweni rerasa kang alus sarta
tenggang rasa kang dhuwur. Mula saka iku dheweke ora nyenengi wong kang
gumedhe, yaiku wong kang congkak, pongah, takabur, ngunggul unggulake awake
dhewe kanthi linuwih lan ngremehake wong liya. Ing bebrayan agung Jawa, watak
kang kaya mangkono iku dianggep watak kang ala lan sabisa bisa didohi amarga
bisa ndadekake memala ing bebrayan agung.
Miturut
wong Jawa, wong kang gumedhe iku nduweni watak kayadene unen-unen “Adigang
Adigung Adiguna”. Tegese, watak ngunggul unggulake kakuatan, kaluhuran lan
kapinteran kang diduweni.Paribasan iki ngelingake menawa kaluwihan kang
diduweni sawijining wong iku kerep ndadekake wong iku dadi gumedhe, lan ing
pungkasane ndadekake memala tumrap dheweke lan wong liya.
Sejatine
kaluwihan kang diduweni wong iku bisa “migunani” lan bisa uga “mbebayani”. Bisa
migunani manawa digunakake kanggo kabecikan, nanging bisa mbebayani manawa
digunakake kanggo tumindak kang ala.Tuladhane, barang kang landhep kaya dene
peso, arit, bendho lan liya liyane. Peso iku pancen kudu landhep supaya gampang
kanggo ngiris daging utawa sayur nalika masak. Nanging, yen carane nggunakake
sembrana bisa natoni driji. Luwih saka iku, amarga landhep, kuat lan lancip,
peso bisa disalahgunakake kanggo mateni wong.
Paribasan
adigang adigung adiguna iki ana sesambungane karo pitutur “Aja Dumeh” kang
tegese aja mamerake apa kang diduweni kanggo ngremehake wong liya. Tuladhane,
aja dumeh sugih banjur nggunakake sugihe kanggo tumindak kang sawenang-wenang.
Amarga bandha iku ora lestari lan sawektu-wektu bisa ilang. Aja dumeh kuwasa
banjur tumindak sakarepe dhewe, lan sapiturute. Sakabehe kang diduweni manungsa
iku amung titipan saka Gusti Kang Maha Kuasa, lan ora bakal langgeng. Tanpa
ridhane Gusti, manungsa ora bakal bisa nduweni.
Isih
akeh filsafat-filsafat Jawa liyane kang ngandhut pitutur adiluhung lan bisa
migunani tumrap urip ing bebrayan agung. Siji kang perlu dadi pangeling-eling,
nyinau kabudayan sawijining dhaerah iku ora ateges awake dhewe dadi rasis utawa
fanatik kedhaerahan, nanging iku kabeh pinangka wujud tanggung jawabe awake
dhewe tumrap tinggalane nenek moyang. Nglestarekake kabudayan dhaerah ora mung
tanggung jawabe warga dhaerah kasebut, nanging uga dadi tanggungjawabe bangsa.Bangsa
kang agung ora mung bangsa kang bisa urip kanthi modern, nanging uga bangsa
kang bisa urip modern tanpa ninggalake ajaran lan nilai luhur budayane.
Tidak ada komentar:
Posting Komentar